أنا ضمني الظلام سنين \\ و مابي انه يضمني زود = دخيلك يا اللي ترفضني \\ تمهّل في قراراتك


تعبت آرخّي من حزني و أشوفك راضيه مشدود = دخيلك رحمة بحالي و لا تظلمني بســواتك


أنا جيتك بعد توبة \\ و ربي يقبل اللي يعود = إليه بقلب تايب له \\ فليه تقسّي صْفاتــك ؟


بعد ما فكت قيودي السجون تلفني بقيود ؟ = بعد ما تعافت ضلوعي \\ تمادى فيني جلداتك ؟


لمن ترميني ؟ للشارع ؟ لدربٍ قاسيٍ مسدود ؟ = لرملٍ ما رحم حافي رجولي \\ مْشابهٍ ذاتك ؟


لدنيا كلها ذيابة ، رغم كثرة أهالي الجود ؟ = لنسرٍ ينتظر موتي ؟ لبحـــرٍ هايـجٍ فاتــك ؟


لمن أشكي و لي صوتٍ بعد سَجني غدا مردود ؟ = لوين أرحل و أنا مدري سوى سكة مسافاتك ؟


أظل إنسانة يا نابذ وجودي و واضعٍ لي حدود = وسط سجني \\ بعد سجني، أظل إنسان شرواتك


حياتي حق \\ كلامي حق \\ وجودي حق \\ مب مفقود = إذا ضمني السجن أيام وانته ف أحلى جناتك


تقبّلني ، ترى رفضي ضياعٍ له حبل معقود = نصيبه من السواد أشيا يثيّرها صدى سكاتك


تقبّلني \\ تعبت أصرخ \\ ترى صبري غدت له حدود = تعبت أترجى ترحمني \\ و ترفضني مراياتك


دخيلك \\ بس أبي أشعر بإن لي ف الحياة وجود = تمهّل لا تضيّعني \\ تمهّل في قراراتـــــــك